У сталіцы стартавала прафілактычная акцыя “Бяспечныя канікулы”

З 15 мая па 31 жніўня ў горадзе Мінску пройдзе рэспубліканская прафілактычная акцыя МНС “Бяспечныя канікулы”.
У гэтым годзе старт акцыі будзе дадзены там, дзе тэма дзіцячай бяспекі гучыць асабліва актуальна, – на бацькоўскіх сходах. Менавіта ў перыяд завяршэння навучальнага года, калі дзеці пераходзяць на «летні рэжым», важна своечасова данесці да бацькоў і дзяцей простую думку: многія трагедыі можна прадухіліць, калі загадзя пагаварыць аб магчымых небяспеках, правілах паводзін і прадумаць вольны час.
1 чэрвеня, ў Міжнародны дзень аховы дзяцей, па ўсёй краіне пройдуць маштабныя мерапрыемствы. На адкрытых пляцоўках сталіцы – парках забаў і адпачынку, каля палацаў культуры і іншых папулярных сямейных лакацыях работнікі МНС арганізуюць яркую інтэрактыўную праграму. Гасцей чакаюць віктарыны і рухомыя конкурсы, дэманстрацыя аварыйна-выратавальнай тэхнікі і абсталявання, паказальныя выступленні падраздзяленняў МНС, канцэртныя нумары, работа роставых лялек і многае іншае.
Для летніх лагерных змен падрыхтаваны цэлы комплекс крэатыўных і навучальных мерапрыемстваў.
Да акцыі далучацца актывісты Беларускай маладзёжнай грамадскай арганізацыі ратавальнікаў-пажарных, прадстаўнікі АСВОД, Беларускага добраахвотнага пажарнага таварыства. Сумесна з работнікамі МНС яны наведаюць прышкольныя і аздараўленчыя лагеры, дзіцячыя сады, пазнаёмяць дзяцей з асноўнымі правіламі бяспекі дома і на вуліцы, раскажуць, як не стаць ахвярай сезонных небяспек і што рабіць у выпадку ўзнікнення надзвычайнай сітуацыі.
Такія мерапрыемствы дапамогуць дзецям праявіць эрудыцыю і кемлівасць, раскрыць творчыя здольнасці, праверыць свае сілы і магчымасці, а галоўнае – замацаваць жыццёва важныя правілы бяспечных паводзін. Таксама будуць паказаны тэматычныя відэа- і мультфільмы МНС.
Толькі сумеснымі намаганнямі дарослых і дзяцей можна зрабіць лета па-сапраўднаму бяспечным. Запрашаем усіх жыхароў і гасцей сталіцы далучыцца да мерапрыемстваў акцыі “Бяспечныя канікулы”!