17 лютага 2026 года ў Музеі прыроды і экалогіі пачынае сваю работу фотавыстава «Зачараваная прыгажосць воднага свету».

Экспазіцыя прымеркавана да Сусветнага дня водна-балотных угоддзяў. Выстава ўяўляе сабой унікальныя кадры, якія адлюстравалі разнастайнасць экасістэм, якія звязаны з вадой.

Сусветны дзень водна-балотных угоддзяў адзначаецца штогод 2 лютага ў дзень падпісання Канвенцыі аб водна-балотных угоддзях. Гэты дзень закліканы прыцягнуць увагу грамадскасці і ўрадаў розных краін да каштоўнасці водна-балотных угоддзяў з мэтай падтрымання экалагічнага балансу планеты.

На выставачным праекце «Зачараваная прыгажосць воднага свету» будуць прадстаўлены больш за 18 фотаработ супрацоўнікаў навуковага аддзела дзяржаўнай прыродаахоўнай установы «Нацыянальны парк «Браслаўскія азёры». Аўтары фота далі мастацкія назвы кожнай сваёй рабоце.

Наведвальнікі змогуць убачыць маляўнічыя краявіды рэк, азёр і іх узбярэжжы. Фатаграфіі, прадстаўленыя на выставе, дэманструюць не толькі эстэтычную каштоўнасць гэтых экасістэм, але і іх важную ролю ў экалогіі планеты.

Экспазіцыя накіравана на прыцягненне ўвагі грамадскасці да важнасці захавання водна-балотных угоддзяў і рацыянальнага выкарыстання водных рэсурсаў.