Нацыянальны гістарычны музей Рэспублікі Беларусь,
філіял “Музей гісторыі тэатральнай і музычнай культуры”

19 снежня ў Гасцёўні Уладзіслава Галубка пачынае працу часовая экспазіцыя “Творчасць галоўнага мастака тэатра ім. Янкі Купалы Б.Ф. Герлавана”, прысвечаная 105-годдзю з дня адкрыцця Нацыянальнага акадэмічнага тэатра імя Я. Купалы.

Сцэнаграфія Б. Ф. Герлавана – унікальная зʼява ў сучасным беларускім тэатры. Вось ўжо больш за пяць дзесяцігоддзяў жыццё мастака звязана з Нацыянальным акадэмічным тэатрам імя Я. Купалы , мастак (1962),  галоўны мастак тэатра (1976). Тэатразнаўства і на пачатку новага тысячагоддзя звяртаецца да яго спектакляў, якія па-ранейшаму застаюцца надзвычай прыкметнымі ў сучасным тэатральным мастацтве. У кожным новым спектаклі сцэнограф застаецца нечаканым і непрадказальным і заўсёды па-новаму дэманструе свой тэатр.

Б.Ф. Герлаван у 1966 г. скончыў аддзяленне сцэнаграфіі Беларускага дзяржаўнага тэатральна-мастацкага інстытута (майстэрня Я. Чамадурава, кіраўнік дыпломнай работы П. Масленнікаў). З 1991 г. выкладае сцэнаграфію ў Беларускай акадэміі мастацтваў, заслужаны дзеяч мастацтваў БССР (1977), народны мастак Беларусі (1990),  атрымаў званне прафесара (1997).

У тэатры імя Я. Купалы Б.Ф. Герлаванам аформлена больш за сто спектакляў. Старонкі гісторыі тэатра складаюць: «Што той салдат, што гэты» Б. Брэхта (1969), «Раскіданае гняздо» Я. Купалы (1972), «Зацюканы апостал» А. Макаёнка (1971), «Брама неўміручасці» К. Крапівы , «Апошні шанц» В. Быкава (1974), «Характары» паводле В. Шукшына (1975), «Ажаніцца – не журыцца» Далецкіх і М. Чарота (1979), «Рэвізор» М. Гогаля(1982), «Радавыя» А.Дударава (1984, Дзяржаўная прэмія СССР – 1985), «Бура»У. Шэкспіра (1986), «Апошні журавель» А. Жука і А. Дударава (1986), «Мудрамер» М. Матукоўскага (1987), «Страсці па Аўдзею» У. Бутрамеева (1989), «Чорная панна Нясвіжа» А. Дударава (2000), «Чычыкаў» паводлеМ. Гогаля (2005),«Вечар» А.Дударава (2006) , «Гарачаесэрца» А. Астроўскага (2022 г.)  і інш.

На часовай экспазіцыі будуць прадстаўлены фотаздымкі мастака, дакументы, макеты і эскізы тэатральных пастановак з фондаў Нацыянальнага гістарычнага музея Рэспублікі Беларусь.

Гасцёўня Уладзіслава Галубка
Адрас: г. Мінск, вул. Старавіленская, 14
Без выхадных, з 10.00 да 19.00
Каса з 10.00 да 18.30
Тэл. для даведак (017) 243-74-03