17 чэрвеня 2026 года ў Музеі гісторыі тэатральнай і музычнай культуры пачне працу выстава да юбілею народнага артыста Беларусі Мікалая Мікалаевіча Яроменкі.

Нарадзіўся Мікалай Мікалаевіч Яроменка 17 чэрвеня 1926 г. у Новасібірску. Бацькі яго былі родам з Віцебскай вобласці. Праходзіў навучанне ў мясцовым рамёсным вучылішчы, пасля якога працаваў токарам на заводзе.

Калі пачался Вялікая Айчынная вайна, юнак дадаў сабе тры гады, каб трапіць на фронт у 15 гадоў. Ваяваў на Калінінскім фронце. Летам 1942 г. у баях пад Вязьмай атрымаў раненне і трапіў у палон. Амаль тры гады знаходзіўся ў розных канцэнтрацыйных лагерах, дзе прымаў удзел у руху супраціўлення, зрабіў некалькі спроб уцёкаў з няволі. Пасля вайны яшчэ некаторы час працаваў у Венгрыі, дапамагаючы рэпатрыіраваць савецкіх грамадзян на Радзіму.

У снежні 1945 г. прыязджае ў Беларусь і становіцца культасветработнікам, узначальвае Бешанковіцкі дом культуры. У 1946 г., падчас агляду мастацкай самадзейнасці ў Віцебску, Мікалая Яроменку заўважыў знакаміты майстар беларускай сцэны Аляксандр Ільінскі, які запрасіў яго на вучобу ў драматычную студыю пры тэатры імя Я. Коласа. А ўжо ў 1948 г. Мікалай Мікалаевіч быў залічаны ў трупу. У яго рэпертуары – героі твораў В. Розава і Ю. Чапурына, Д. Граніна і Г. Нікалаевай, С. Смірнова і П. Глебкі, М. Горкага і Л. Талстога.

У 1955 г. М. Яроменку было прысвоена званне заслужанага артыста БССР. У 1959 г. яго запрасілі ў трупу тэатра імя Я. Купалы. Больш за 30 гадоў Мікалай Яроменка (народны артыст БССР, 1964; народны артыст СССР, 1989) аддаў купалаўскай сцэне, тры з іх – у якасці дырэктара тэатра.

Кінематограф таксама яркая старонка ў творчай біяграфіі Мікалая Мікалаевіча. На рахунку Яроменкі-кінаакцёра 50 мастацкіх і тэлевізійных фільмаў («Наперадзе круты паварот», «Першыя выпрабаванні», «Масква-Генуя», «Запомнім гэты дзень», «Крушэнне імперыі» і іншыя).

Мікалай Мікалаевіч праводзіў актыўную грамадскую дзейнасць: 1976 – 1987 гг. – старшыня праўлення Беларускага тэатральнага аб’яднання, 1987 – 1992 гг. – Старшыня праўлення Саюза тэатральных дзеячаў, з 1992 г. – прэзідэнт Беларускай канфедэрацыі творчых саюзаў, у 1996 – 2000 гг. – член Савета Рэспублікі Нацыянальнага сходу Рэспублікі Беларусь.

На выставе будуць прадстаўлены матэрыялы з фондаў Нацыянальнага гістарычнага музея Рэспублікі Беларусь: фотаздымкі, дакументы ўзнагароды, асабістыя рэчы М.М. Яроменкі.

г. Мінск, зав. Музычны, 5
Без выходных
с 10:00 до 19:00
тэл. 326-26-67