29.11.2024 – 30.01.2025

Новы год – самае вясёлае і яркае свята. Яго любяць і дарослыя, і дзеці. З Новым годам звязваюць надзеі на самае лепшае, загадзя рыхтуюцца да яго сустрэчы. Адзначаюць гэта свята па-рознаму: адны ідуць у госці, другія святкуюць дома з сям’ёй, трэція выязджаюць на прыроду – у зімовы лес.

Выстава «Навагодняя палітра прыроды» падрыхтавана юнымі мастакамі інклюзіўнай арт-школы «Вышэй за дах» г. Мінска. Работы, выкананыя дзецьмі, напоўнены чараўніцтвам дзіцячага ўспрымання прыроды. Праз зімовыя сцэны і навагоднія выявы аўтары перадалі атмасферу зімы з яе чароўнымі ўзорамі, святлом свята і прыгажосцю наваколля.

Асноўная задача выставы – ня проста паказаць творчасць, але і даць юным мастакам магчымасць раскрыць унутраны свет праз яркія мастацкія вобразы. Кожнае палатно становіцца голасам дзіцяці, яго шчырым стаўленнем да навакольнага свету.