10 сакавіка 2025 года ў Музеі сучаснай беларускай дзяржаўнасці, філіяле Нацыянальнага гістарычнага музея Рэспублікі Беларусь, пачынае працу часовы выставачны праект, прымеркаваны да дня прыняцця Канстытуцыі Рэспублікі Беларусь.

Канстытуцыя – асноўны закон дзяржавы. Да ліку галоўных прынцыпаў, якія пранізваюць нормы Канстытуцыі, трэба аднесці: вяршэнства права, гарантыю і захаванне правоў чалавека і грамадзяніна, дэмакратычны парадак фарміравання органаў улады. Канстытуцыя ўвасобіла ў сабе гістарычны досвед станаўлення беларускай дзяржаўнасці. Яна грунтуецца на неад’емным суверэнным праве беларускага народа самастойна вызначаць свой лёс і быць паўнапраўным суб’ектам сусветнай супольнасці.

27 лютага 2022 года ў нашай краіне адбыўся рэспубліканскі рэферэндум па пытанні ўнясення змяненняў і дапаўненняў у Канстытуцыю Рэспублікі Беларусь. За прыняцце рашэння па вынесеным на рэферэндум пытанні прагаласавала 82,86 працэнта грамадзян, гэта значыць большасць грамадзян, унесеных у спісы для галасавання.

Выставачны праект, прысвечаны Дню Канстытуцыі Рэспублікі Беларусь, адлюстроўвае храналогію станаўлення канстытуцыйных асноў у Беларусі, расказвае аб ходзе падрыхтоўкі і прыняцця Канстытуцыі 1994 года, унясенні ў яе змяненняў і дапаўненняў у сувязі з палітычнымі, сацыяльна-эканамічнымі і культурнымі рэаліямі, якія імкліва змяняюцца.

У экспазіцыі будуць прадстаўлены арыгінальныя экзэмпляры Канстытуцый Рэспублікі Беларусь розных гадоў, прадстаўленыя Нацыянальным архівам Рэспублікі Беларусь, друкаваныя выданні са збору Прэзідэнцкай бібліятэкі Рэспублікі Беларусь і матэрыялы з фондаў Нацыянальнага гістарычнага музея Рэспублікі Беларусь. Госці выставачнай экспазіцыі пазнаёмяцца з дакументамі, якія адлюстроўваюць дзейнасць Цэнтральнай выбарчай камісіі Рэспублікі Беларусь, а таксама ўбачаць падарункі замежных дэлегацый. Выстаўка падрабязна раскрые асноўныя палажэнні дзеючай Канстытуцыі Рэспублікі Беларусь, яе ролю і месца ў сістэме дзяржаўнага ладу краіны.