29 сакавіка 2025 года ў Музеі гісторыі беларускага кіно, філіяле Нацыянальнага гістарычнага музея Рэспублікі Беларусь, пачынае працу часовая экспазіцыя «Жыццё прысвячаючы», прымеркаваная да 125-годдзя з дня нараджэння кінарэжысёра У.У. Корш-Сабліна.

Уладзімір Корш-Саблін – адна з ключавых фігур беларускага і савецкага кіно. Яго творчасць пакінула глыбокі след у гісторыі айчыннага кінематографа, а фільмы, такія як «Канстанцін Заслонаў» і «Хто смяецца апошнім», сталі класікай і па гэты дзень натхняюць новыя пакаленні гледачоў і кінематаграфістаў.

На выставе будуць прадстаўлены ўнікальныя экспанаты, у тым ліку і рэдкія фатаграфіі, дакументы, сцэнарыі, плакаты да найбольш значных карцін рэжысёра. У рамках часовай экспазіцыі запланавана правядзенне тэматычных экскурсій, кіналекторыяў, якія дазволяць глыбей зразумець уклад Уладзіміра Корш-Сабліна ў мастацтва кіно.

Запрашаем усіх аматараў кіно і мастацтва наведаць выставу і даведацца больш пра жыццё і творчасць аднаго з самых значных рэжысёраў Беларусі!

Выстава працуе па 29 красавіка 2025 года.