Нарадзіўся акцёр тэатра і кіно Расціслаў Іванавіч Янкоўскі 5 лютага 1930 года ў Адэсе. У 1951 годзе скончыў тэатральную студыю пры Ленінабадскім драматычным тэатры і да 1957 года працаваў у гэтым тэатры.

У 1957 годзе разам з жонкай Нінай і сынам Ігарам пераехаў у Мінск, быў прыняты акцёрам у Дзяржаўны рускі драматычны тэатр Беларускай ССР ім. М. Горкага (цяпер Нацыянальны акадэмічны драматычны тэатр імя М. Горкага), дзе служыў да канца свайго жыцця.

Больш за 160 галоўных роляў, сыграных у тэатры, а таксама каля 60 у кінафільмах, прынеслі Расціславу Янкоўскаму ўсенародную вядомасць і любоў гледачоў у Рэспубліцы Беларусь, блізкім і далёкім замежжы. Сярод іх вобразы, якія, безумоўна, увайшлі ў скарбонку нацыянальнага тэатральнага мастацтва: Джэры – “Двое на арэлях” У. Гібсана, Арбенін – “Маскарад” М. Лермантава, Віктар – “Варшаўская мелодыя” Л. Зорына, Макбет – “Макбет” У. Шэкспір. Паднятая цаліна” М. Шолахава, Антоній – “Антоній і Клеапатра” У. Шэкспіра, Ягор Булычоў – “Ягор Булычоў і іншыя” М. Горкага, Вяршынін “Тры сястры” А. Чэхава, Пётр Першы – “Хрыстос і Антыхрыст” Д. Меражкоўскага, Арган – “Уяўны хворы” Ж. Б. Мольера, Клаўдзій – “На Залатым возеры” Э. Томпсана, Ісак Борг – “Сунічная паляна” І. Бергмана, Пане Каханку – “Пане Каханку” А. Курэйчыка і многія іншыя.

Расціслаў Іванавіч Янкоўскі меў вялікі аўтарытэт і павагу сярод калег, прымаў актыўны ўдзел у культурным і грамадска-палітычным жыцці краіны, з’яўляўся старшынёй Міжнароднага кінафестываля “Лістапад”, а таксама членам Прэзідыума Беларускага саюза тэатральных дзеячаў. Расціслаў Іванавіч атрымаў Ганаровыя званні заслужаны артыст БССР (1963 год), народны артыст БССР (1967 год), народны артыст СССР (1978 год). Узнагароджаны шматлікімі медалямі і ордэнамі.

Расціслаў Іванавіч Янкоўскі – гэта сапраўды нацыянальны скарб краіны, вялікі Артыст і Грамадзянін. Служэнне Р.І.Янкоўскага тэатральнаму мастацтву і яго праца ў Нацыянальным акадэмічным драматычным тэатры імя М. Горкага з’яўляюцца яскравым прыкладам неверагоднай самааддачы сваёй справе – Тэатру.

Памёр 26 чэрвеня 2016 года ў Менску. Пахаваны на Усходніх могілках.

На выставачнай экспазіцыі будуць прадстаўлены матэрыялы з фондаў Нацыянальнага гістарычнага музея Рэспублікі Беларусь.

Уваход на выставу па квітку на пастаянную экспазіцыю музея.