Сяргей Картэс нарадзіўся ў горадзе Сан-Антоніо (Чылі) 18 лютага 1935 года. Дзіцячыя і юнацкія гады правёў у Аргенціне. У Мінск прыехаў у 1955 годзе. Лёс навечна звязаў Сяргея Картэса з Беларуссю, дзе ён скончыў музычную школу, кансерваторыю, аспірантуру і стаў сапраўдным кампазітарам.

Свой шлях у мастацтве кампазітар пачаў у 1960-ыя гады. У розныя перыяды ён кіраваў музычнай часткай Дзяржаўнага рускага драматычнага тэатра, Беларускага тэатра імя Я. Купалы, працаваў у Беларускім рэспубліканскім тэатры юнага гледача, быў галоўным музычным рэдактарам “Беларусьфільма”. За гэты час кампазітар напісаў музыку да спектакляў класічнага рэпертуару: “Многа шуму з нічога” У. Шэкспіра, “Вішнёвы сад” А. Чэхава, “Дзеці сонца”, М. Горкага, “Раскіданае гняздо” Я. Купалы, “Сымон-музыка” Я. Коласа і інш.

Багаты вопыт у галіне тэатральнай музыкі дазволіў Картэсу звярнуцца да опернага жанру. У 1977 г. на сцэне Дзяржаўнага акадэмічнага тэатра оперы і балета БССР (цяпер Нацыянальны акадэмічны Вялікі тэатр оперы і балета Рэспублікі Беларусь) адбылася прэм’ера першай яго оперы “Джардана Бруна”, праз некаторы час з’явіліся оперы “Матухна Кураж” (1980) і “Візіт дамы”.

За шэсць дзясяткаў творчага жыцця Сяргей Картэс напісаў вялікую колькасць цудоўных музычных твораў: араторыю “Памяці Паэта” на вершы Я. Купалы, вакальна-сімфанічную паэму “Попел” на вершы Э. Межэлайціса, шэраг буйных твораў для сімфанічнага і камернага аркестраў, камерна-інструментальную музыку, песні і рамансы.

Плённым было супрацоўніцтва кампазітара з кінастудыяй “Беларусьфільм”: музыка Картэса гучыць у шэрагу мастацкіх, дакументальных і мультыплікацыйных фільмаў. За музыку да кінафільма “Вазьму твой боль” паводле рамана І. Шамякіна кампазітару была прысуджана ў 1982 годзе Дяржаўная прэмія Беларусі. Ганаровае званне народнага артыста Беларусі атрымаў у 1999 годзе.

Сяргей Альбертавіч Картэс з’яўляўся дырэктарам і мастацкім кіраўніком Нацыянальнага акадэмічнага тэатра оперы Беларусі (1991-2002).

Памёр кампазітар 26 ліпеня 2016 года.

На выставе прадстаўлены матэрыялы з фондаў Нацыянальнага гістарычнага музея Рэспублікі Беларусь.