Национальный исторический музей Республики Беларусь

Для людзей са слабым зрокам
Запіс па тэлефоне

Часовая экспазіцыя да 100-годдзя з дня нараджэння народнай артысткі Беларусі Ніжнікавай Тамары Мікалаеўны

8 сакавіка ў Музеі гісторыі тэатральнай і музычнай культуры, філіяле Нацыянальнага гістарычнага музея Рэспублікі Беларусь пачынае працу часовая экспазіцыя да 100-годдзя з дня нараджэння народнай артысткі Беларусі Ніжнікавай Тамары Мікалаеўны.

Тамара Мікалаеўна Ніжнікава артыстка оперы, педагог, народная артыстка БССР (1955) і народная артыстка СССР (1964), нарадзілася 9 сакавіка 1925 года ў Самары (Расія). У 1949 годзе скончыла Маскоўскую кансерваторыю імя П.І.Чайкоўскага, з’яўлялася салісткай Дзяржаўнага акадэмічнага Вялікага тэатра оперы і балета БССР (1949 – 1976), выступала як канцэртная спявачка, гастралявала за мяжой, выкладала ў кансерваторыі (1964–1986).

Тамара Мікалаеўна валодала голасам чыстага, серабрыстага тэмбру, філіграннай каларытнай тэхнікай. Творчасці артысткі характэрны мяккі лірызм, кранальная жаноцкасць, шчырасць і шматграннасць у абмалёўцы вобразаў. З вялікім поспехам выступала ў нацыянальных операх: Марфачка «Дзяўчына з Палесся» Я.Цікоцкага, Юлечка («Надзея Дурава» А.Багатырова), Ірына («Калючая ружа» Ю.Семянякі), Антаніда («Іван Сусанін» М.Глінкі), Лена («Кастрычнік» В.Мурадэлі), Любка Шаўцова («Маладая гвардыя» Ю.Мейтуса), Ганна («Страшны двор» С.Манюшкі), Адзіна («Любоўны напой» Г.Даніцэці), Цэрліна («Фра-Д’ябала» Ф.Абэра), Лакмэ (аднайменная опера Л.Дэліба), Мікаэла («Кармэн» Ж.Бізэ). Партыя Марынкі ў аднайменнай оперы Р.Пукста была напісана спецыяльна для яе.

Бліскуча выконвала характарныя партыі Баба-Лапатуха ў оперы «Міхась Падгорны» Я.Цікоцкага, Ліса ў оперы «Церам-церамок» І.Польскага, партыі ў класічных аперэтах: Адэль, Арсена («Лятучая мыш», «Цыганскі барон» І.Штраўса), Жэрмена («Карнявільскія званы» Р.Планкета).

У Тамары Мікалаеўны вялікі канцэртны рэпертуар, значнае месца ў якім займалі творы беларускіх кампазітараў, напісаныя спецыяльна для яе.

Голас Тамары Мікалаеўны гучаў у тэатры да 1976 года, пасля яна прысвяціла сябе педагагічнай дзейнасці, удзельнічала ў перадачах беларускага тэлебачання і радыё.

15 лютага 2018 года Тамары Мікалаеўны не стала, пахавана на ўсходніх могілках.

На часовай экспазіцыі прадстаўлены матэрыялы з фондаў Нацыянальнага гістарычнага музея Рэспублікі Беларусь і асабістага архіва сям’і.