12 сакавіка ў Гасцёўні Уладзіслава Галубка пачынае працу выстава «Беларускі дзяржаўны тэатр. Пачатак: драматургія, сцэнаграфія, трупа (1920-1930-ыя гг.)», прысвечаная 105-годдзю з дня адкрыцця ў Мінску Нацыянальнага акадэмічнага тэатра ім. Я. Купалы.

14 верасня 1920 г. адбылася значная падзея ў культурным жыцці Беларусі – урачыстае адкрыццё ў Мінску Беларускага дзяржаўнага тэатра. З гэтага часу ў беларускага народа быў свой пастаянны тэатр, дзейнасці якога надавалася дзяржаўнае значэнне, для развіцця якога ствараліся ўсе неабходныя ўмовы.

Праграма адкрыцця тэатра была вельмі разнастайная. Пасля выканання хорам «Інтэрнацыянала» беларуская трупа паказала спектакль «Рысь» Э. Ажэшкі. У адкрыцці тэатра прымалі ўдзел руская і яўрэйская трупы. Праграма мела вялікі поспех, таму на наступны дзень была паўторана.

Першы Беларускі тэатр пачаў аб’ядноўваць вакол сябе ўсё лепшае, што засталося нам у спадчыну ад мінулага: артыстаў і рэжысёраў, мастакоў, кампазітараў і драматургаў, якія ўжо выявілі сябе на сцэнах іншых тэатраў.

Мастацкім кіраўніком зноўстворанага калектыву быў прызначаны Ф.Ждановіч (1920-1921), які ў сваёй творчасці шмат увагі надаваў пастаноўкам беларускіх п’ес. У 1920-1930-ыя гг. мастацкае кіраўніцтва БДТ-1 таксама ажыццяўлялі: Е.Міровіч (1921-1931), Л.Літвінаў (1932-1937), Л.Рахленка (1937—1943).

Рэпертуартэатраў 1920-30-ыя гг. складаўся: «Паўлінка» Я.Купалы, «На дне» М.Горкага, «Раскіданае гняздо» Я.Купалы, «На Купалле» М.Чарота, «Жрэц Тарквіній» С.Паліванава, «Машэка» Е.Міровіча, «Каваль-ваявода» Е.Міровіча, «Бацькаўшчына» К.Чорнага, «Жакерыя» па П.Мерымэ, «Хто смяецца апошнім» К.Крапівы і інш.

Тэатральна-дэкарацыйным афармленнем сцэны ў 1920-1930-ыя гг. займаліся мастакі: К. Елісееў, А.Марыкс, М.Акссельрод, Б.Малкін і інш.

Аснову маладога тэатра ў 1920-1930-х гг. склалі акцёры: Ф.Ждановіч, К.Саннікаў, П.Мядзёлка, У.Фальскі, У. Крыловіч, У.Уладамірскі, Б. Платонаў,

С.Станюта, В.Пола, Л.Ржэцкая, Г.Глебаў, С.Бірыла, З.Стома, А.Бараноўскі, Г.Макарава, У.Дзядзюшка, З. Браварская і інш. Гэтаму легендарнаму пакаленню было наканавана стаць першымі зоркамі айчыннай сцэны, заснавальнікамі нацыянальнай акцёрскай школы.

На часовай экспазіцыі будуць прадстаўлены фотаздымкі трупы, афіша ўрачыстага адкрыцця тэатра, асабістыя рэчы артыстаў, эскізы тэатральных пастаноў з фондаў Нацыянальнага гістарычнага музея Рэспублікі Беларусь.