Часовая экспазіцыя «Вышыўка. З калекцыі Алены Іванаўны Дубініч»
Дубініч Алена Іванаўна нарадзілася ў 1946 годзе ў Нясвіжскім раёне Мінскай вобласці. З дзяцінства захаплялася вышыўкай і ткацтвам, пераняўшы майстэрства ад маці. Праз увесь свой жыццёвы шлях майстрыха пранесла любоў да народнай дэкаратыўна-прыкладной творчасці. Сярод яе вырабаў – тканыя паясы з беларускім арнаментам, пакрывалы, вышытыя іконы, якімі ўпрыгожаны храм Узнясення Гасподня г. Нясвіжа, творы з бісеру.
Асноўнае захапленне майстрыхі – вышыўка ручнікоў. У яе калекцыі знаходзяцца рукатворныя абрадавыя ручнікі для самых розных падзей чалавечага жыцця. Веды аб беларускіх народных вясельных ручніках, іх сімволіцы і фатаграфіі ручнікоў, вырабленых сваімі рукамі, Дубініч А.І. размясціла ў кнізе «Беларускі ручнік. З мінулага ў дзень сённяшні».
Алена Іванаўна з'яўляецца аўтарам серыі вышытых работ «Сталіцы рэспубліканскіх «Дажынак (1996-2013)», дзе маляўніча і з высокім майстэрствам адлюстравала гісторыю свята працаўнікоў вёскі.
На выставе прадстаўлены вышытыя абрадавыя ручнікі, запатэнтаваныя сувенірныя ручнікі «Мінск» і «Нясвіж», серыя вышытых работ «Сталіцы рэспубліканскіх «Дажынак (1996-2013)» і іншыя саматканыя і вышытыя вырабы.
Уваход на выставу па квітку на пастаянную экспазіцыю музея.
Выстава будзе працаваць з 18 ліпеня па 7 жніўня 2022 года.
Генеральныя партнёры
Апошнія фота
